सुन्दरहरैंचा । जेनजी आन्दोलनका क्रममा क्षतिग्रस्त भएको मोरङको सुन्दरहरैंचा नगरपालिकालाई कार्यालय सामग्री हस्तान्तरण गरिएको छ ।
पूर्वनगर प्रमुख शिवप्रसाद ढकालको पहलमा नगरपालिकालाई स्टिल दराज १० थान, टेवल कम्प्युटर १० थान र प्रिन्टर चार थान हस्तान्तरण गरिएको हो । नगरपालिकालाई आरएनजी कंक्रिट प्रालिले १० थान दराज, १० थान टेवल कम्प्युटर उपलब्ध गराएको छ ।
सुन्दरहरैंचाको सहारा पूर्वाञ्चल हाउजिङ प्रालि, रोयल वशिष्ठ हाउजिङ एण्ड रियल स्टेट प्रालि, विराट डेन्टल क्लिनिक, शारदा हार्डवेयर, सलकपुर किराना स्टोर, जयश्री कंक्रिट प्रालि र केवी तथा अनिता श्रेष्ठले एक–एक थान कम्प्युटर, कञ्चनजंघा इन्डष्ट्रिज प्रालिले कम्प्युटर र प्रिन्टर एक–एक थान, सुन्दरहरैचा ७ का विशाल खरेलले प्रिन्टर २ थान र सिपीएन इन्फोसिस् प्रालिले प्रिन्टर एक थान नगरपालिकालाई उपलब्ध गराएको पूर्वनगर प्रमुख ढकालले बताए ।
सुन्दरहरैंचाका नगरप्रमुख केदारप्रसाद गुरागाईंले नगरवासीसँग हातेमालो गर्दै अघि बढ्ने बताए । उनले नगरपालिकाले सेवा प्रवाह सुरु गरिसकेको उल्लेख गर्दै नगरपालिका जलेर नष्ट भएपनि निराश भएर बस्ने अवस्था नभएको उल्लेख गरे ।
भदौ २४ गते भएको आन्दोलनका क्रममा नगरपालिकाको करिव ४ करोड ३० लाख बराबरको भौतिक क्षति भएको प्रमुख प्रशासकीय अधिकृत विनोदकुमार न्यौपानेले जानकारी दिए ।
सम्बन्धित समाचार
